Моңғолия астанасы Ұлан-Батыр қаласында дәстүрлі «Бүркіт тойы – 2025» фестивалі өз мәресіне жетті. Биылғы шараға Моңғолияның әр аймағынан келген 22 бүркітшімен қатар, Қазақстан мен Қырғызстаннан келген спортшылар да қатысты.

Қазақстанның намысын қорғаған Серікболсын Жалғасұлы өз өнерін жоғары деңгейде көрсетіп, жүлделі үшінші орынды иеленді. Оның бүркіт баптаудағы шеберлігі мен саятшылық дәстүрін жетік меңгергені фестиваль қонақтары мен қатысушыларының жоғары бағасына ие болды.

Екі күнге созылған ауқымды шара барысында көрермендер көшпенділердің салт-дәстүрлерімен және бірегей мәдениетімен танысуға мүмкіндік алды.

Жыл сайын ұйымдастырылатын «Бүркіт тойы» биыл 19-шы рет өткізілді. Бұл фестивальдің басты мақсаты – ата-баба мұрасын жас ұрпаққа жеткізу  және дәстүрлі аңшылық өнерін жаңғырту.