Бүгін құсбегілік спорт түрі бойынша мандаттық комиссияның отырысы өтті. Шара барысында қатысушылар тіркеуден өтіп, сайыстағы реттіліктері анықталды.

Тіркеуден жалпы 10 мемлекеттен (Қазақстан, Қырғызстан, Ресей, Моңғолия, Испания, Канада, Мажарстан, Қытай, Грузия, Түркия) 42 қатысушы өтті. Олар құстың 3 түрі бойынша жарысқа түседі: бүркіт құсы бойынша – 18  спортшы, қаршыға бойынша – 12 спортшы, ителгі бойынша – 12 спортшы. Бас төреші – Марат Қойшинның айтуынша, төрткүл тарап көз тіккен байрақты бәсекеге спортшылар да, төрешілер де, сайыс өтетін алаң да толыққанды дайын.

Сондай-ақ мандаттық комиссия отырысында төрешілер қатысушылардың сайыс ережелеріне қатысты сұрақтарына жауап беріп, спортшылардың реттілігін жеребе тарту әдісімен анықтады. Оның нәтижесінде Қазақстан құрамасының құсбегілері құстың 3 түрі бойынша да алғашқы болып бақ сынайтын болады.

Атап өтсек, байрақты бәсекеде елімізді республикалық чемпионаттардың жүлдегерлері, халықаралық турнирлердің жеңімпаздары атанған 9 үздік құсбегі таныстырады. Олар, бүркіт құсы бойынша – Серікбек Кунтуган, Ерзат Байкадамов, Арман Кушкаров, қаршыға құсы бойынша – Дәурен Аршабай, Бағдат Кеуенов, Құдайберген Рауилұлы және ителгі құсы бойынша – Ерлан Кенжетаев, Бақдәулет Бабажан, Ибрагим Базарбаев.

Айта кетейік, «Құсбегілік» Федерациясы» РҚБ-нің Бас серіктесі – «Самұрық Қазына» ҰӘҚ» АҚ, серіктесі – «Туризм индустриясы мен спортты қолдау қоры» КҚ

Жарыстың ашылу салтанаты: 12 қыркүйек, сағат – 10.00

Жарыстың өтетін орны: Астана қаласы, Этноауыл аумағы