Талдықорған қаласында ұлттық спорттың мәртебесін асқақтатар «Жетісу Салбурыны – 2025» құсбегілік турнирі жалауын көтерді. Дәстүрлі додаға Қазақстанның түкпір-түкпірінен жиналған үздік құсбегілер қатысуда
Бүгінгі жарыстар қыран бүркіттерге арналды. Құсбегілер сайыстың негізгі кезеңдері – бүркітті қолға шақыру және шырғаға салу бойынша бақ сынады. Бұл сынақтар қыранның үйретілу деңгейі мен аңшылық қабілетін айқындайды.
Жарыстың шешуші кезеңі ертең өтеді. Финалда қатысушылардың ең мықты бүркіттері шеберліктерін көрсетсе, ителгі мен қаршыға құстары да өз өнерлерін ортаға салмақ.
Айта кетейік, 13-16 наурыз аралығында өтетін бұл сайыс еліміздің әр өңірінен келген құсбегілердің басын қосты. Турнирдің алғашқы күні мандат комиссиясы барлық қатысушылардың дайындығын пысықтады. Биылғы додаға Астана, Алматы қалаларынан, сондай-ақ Алматы, Абай, Атырау, Жамбыл, Жетісу, Қарағанды және Шығыс Қазақстан облыстарынан келген спортшылар тіркелді. Жалпы, турнирге 51 бүркіт, 7 ителгі және 15 қаршыға қатысып жатыр.
Ұлттық өнерді дәріптеген бәсеке өз мәресіне жеткенше, қатысушылар нағыз аңшылық өнердің қыр-сырын көрсетіп, өзара тәжірибе алмасатын болады.
Айта кетейік, бұл турнирдің өтуіне Республикалық Құсбегілік Федерациясының Бас серіктесі – «Самұрық Қазына» ҰӘҚ» АҚ, сондай-ақ, ҚР Туризм және спорт министрлігі, Жетісу облысының әкімдігі, «Туризм индустриясы мен спортты қолдау қоры» КҚ және ҚР Ұлттық спорт қауымдастығы атсалысуда.
