Астана қаласына іргелес Софиев ауылында Күнтуған Тоқтыбайұлы атындағы халықаралық құсбегілік турнирінің алғашқы жарыс күні бастау алды. Сағат 11:00-де турнирдің салтанатты ашылу рәсімі өтіп, қатысушылар мен қонақтар ұлттық дәстүрдің мерейлі сәтіне куә болды.

Жарыс бағдарламасына сәйкес бүгін құсбегілер бүркітті қолға шақыру, шырғаға салу, сондай-ақ ителгі мен қаршығаны қолға шақырып, кептерге салу сайыстарында өз шеберліктерін сынайды. Бұл кезеңдерде қыран құстардың қырағылығы мен иелерінің дайындығы бағаланып, ұлттық өнердің бай мұрасы паш етіледі.

Айта кетейік, биылғы додаға Қазақстанның 9 облысы мен 2 қаласынан, сондай-ақ Түркия, Моңғолия, Ресей және Қырғызстаннан келген құсбегілер қатысып отыр. Жалпы, мандаттық комиссиядан 47 бүркіт, 10 қаршыға және 9 ителгі өткен болатын.

Айта кетейік, бұл турнирдің өтуіне Республикалық Құсбегілік Федерациясының Бас серіктесі – «Самұрық Қазына» ҰӘҚ» АҚ, сондай-ақ ҚР Туризм және спорт министрлігі, «Туризм индустриясы мен спортты қолдау қоры» КҚ және Астана қаласының дене шынықтыру және спорт басқармасы қолдау көрсетуде.